KALIBO, Aklan—Suportado it Department of Tourism (DOT) ro pagpasarado sa sangka establisimento sa isla it Boracay nga gina-alegar nga nagpatigayon it Halloween party nga ginasugid nga nag-eabag sa Coronavirus Disease 2019 (COVID-19) health protocols ko Oktubre 31.
Nauna eon nga ginkundina it DOT ro ginakabig kara nga iresponsabli nga pagtililipon sa Casa de Arte sa Sitio Cagban, Barangay Manoc-Manoc.
Nataeupangdan sa kontrobersiyal nga video nga owa nagasunod sa physical distancing ag owa it suksok nga facemask ro partygoers.
Madumduman nga ko Oktubre 1 hay ginbuksan ro isla sa local tourism.
Natukiban sigon nga ro nasambit nga establisimento hay owa it nagakaigo nga business permit ag iba pang clearances.
Suno kay DoT Secretary Bernadette Romulo-Puyat nga kinahangean nga masiguro it lokal nga gobyerno it Malay ag mga negosyante nga maging eowas ro uman nga pagbukas it isla.
