KALIBO, Aklan — Ginpasiguro it Department of Public Works and Highways (DPWH) nga matapos nanda ro nagapadayong road widening project ag circumferential road sa uman nga pagbukas ko isla iot Boracay sa Oktubre 26.
Raya hay kasunod it ginpahayag ni Nenette Aguirre-Graf, Malay Sangguniang Bayan member ag presidente it Boracay Foundation Incorporated (BFI) nga bukon pa it haom ro main road it isla sa reopening kara.
Sa interview it Bombo Radyo, ginpahayag ni DPWH-Aklan assistant district engineer Leo Beonat nga target nanda nga apisar may nabilin pang trabaho sa masunod nga buean hay pwede eon nga maagyan ro mga karsada ag inde makadisturbo sa daeagan it trapiko.
Pila sigon sa mga kinahang-ean pa nandang trabahuhon hay ro pag-semento it pilang karsada, pagbutang it sidewalk ag pedestrian lanes, pag-ayos it drainage ag sewage system.
Sambilog ro pagsaayos it karsada sa mga nagapangunang ginatutukan sa an-om nga bueang rehabilitasyon it isla nga nag-umpisa ko Abril 26 kat ginsarado ro Boracay sa mga turista.
Katuyuan kara nga masolusyunan ro gutok nga trapiko sa main road bangud sa padayon nga pagtaas ko numero it mga saeakyan sa pihak it magutok nga karsada.
