KALIBO, Aklan—Ginklaro it Department of Public Works and Highways (DPWH) Aklan nga nag-agi sa maid-id nga assessment ro road section sa bahin it Brgy. Tambak, New Washington antes nga ginrekomenda for repair.
Ginpaathag ni Engr. Leo Bionat it DPWH Aklan nga ro nasambit nga karsada hay ginhimo pa ko 1988 kon sa siin kapin sa 32 anyos eon raya nga uwa nabayluhan mag-eowas eon lang sa sigidas nga pagbutang it aspalto.
Bangud kara, nakitaan it mga cracks ro karsada nga bukon eon it eowas sa mga saeakyan nga naga-aeagi.
Sa kamatuoran suno kana hay hasta sa 20 anyos eamang ro life span mga karsadahon apang kon maayos pa raya hay anda eamang nga ginarepair apang uwa eon nagabuhay it pilang dag-on.
Ginpaathag dugang nga antes magselect it proyekto hay may ginapatigayon man nga road ag bridge assessment kon sa siin may coordination sa regional office ag ginavalidate it central office.
Bilog nga national ag provincial road suno kana hay may datos sa andang taeatapan kon san-o gin-obra ag kon san-o man nahuman.
Ro sa bahin it tambak hay maabo eon sandang nakita ag nataeopangdan nga kinahang-ean eon raya nga i-repair.
Bangud sa bulto it mga behikulo nga naga-agi hay ro kadamueon it semento sa karsada hay point 3 ag raya eon ro andang standard sa makaron.
Nasayuran ro nasambit nga proyekto it DPWH hay ginreklamo it pila ka mga residente ag umaeagi bangud nga maayos pa sigon ro karsada apang anda eon raya nga ginguba ag ginbayluhan it bag-o.
