KALIBO, Aklan–Ginpasiguro it Department of Public Works and Highways ukon DPWH-Aklan nga nagapadayun ro andang pag-repair sa mga pothole sa national highway it probinsya.
Suno kay Engr. Joey Ureta, Head it Maintenance Section it DPWH-Aklan nga naka-sentro ro andang konstruksyon ag rehabilitasyon sa daeanon nga sakop it Eastern side.
Basta sigon manami ro tyempo hay padayun ro andang pagtrabaho.
May mga kahigayunan pa suno kana nga naga-overtime ro andang mga maintenance crew.
Sa kamatuoran suno kana hay temporaryo nana nga ginpull-out ro andang tawuhan idto sa Western side para tutukan ro maabu nga pothole halin Brgy. Libas, Banga paadto it Altavas.
Nag-apela man raya it sangkiri nga pasensya sa mga pumueoyo ag motorista kadungan it paathag nga ginahimo nanda ro tanan agud nga maayos eon ro kasamaran sa karsada.
Madumduman nga sangka motorista ro naaksidente-patay kabi-i matapos nga masaeawig it van nga nagalikaw sa mga eubak-eubak nga karsada sa bahin it Brgy. Aranas, Balete.
Ro biktima hay nakilaea kay Ronnie Mationg, sa legal nga edad ag residente it Brgy. Morales sa nasambit nga banwa samtang ro driver it van hay ginkilaea kay Dominic Juanico it Sapian, Capiz.
