Kalibo Aklan–Ginahueat eon lang it pamunuan it Department of Public Works and Highways (DPWH) Aklan ro ‘go-signal’ halin sa Municipal Health Office (MHO) Kalibo agud nga makabalik eon sa andang normal nga operasyon sa Lunes, Hunyo 21, 2021.
Suno kay Engr. Alejandro Ventilacion, District Engineer it DPWH-Aklan nga ginahueat eon lang nanda ro clearance.
Miyerkules nga adlaw, Hunyo 9 kat temporaryong gin-lockdown ro nasambit nga taeatapan matapos nga magpositibo sa COVID-19 ro 24 sa andang mga empleyado.
Sa makaron hay ap-at eon ro nakatapos it andang 14 diyas nga quarantine period samtang ro 20 nga iba pa hay nagapamayad pa sa andang natungdan nga mga quarantine facility.
Ginasugid nga maayos man ro andang kundisyon ag owa eon it sintomas it deadly virus.
Gindugang pa ni Engr. Ventilacion nga nagpasa eon sanda it sueat sa lokal nga gobyerno it Kalibo angot sa andang request.
Samtang, maskin limitado, apang padayun ro operasyon it DPWH-Aklan kun sa siin natigayon man nga mapadaea ‘on-time’ ro andang mga papeles bangud sa work from home ag skeleton workforces arrangement kapareho it anang gina-obra.
Samtang, bukon man sigon it apektado ro andang maintenance division bangud nga kaabuan sa mga empleyado hay nakadeploy sa field ag owa it close contact sa mga nagpositibong empleyado.
Sa pihak nga parte, hugut nga igabawae anay nana sa sueod it mga opisina ro pagtipon-tipon agud nga malikawan ro pagtaeapnan it coronavirus.
