KALIBO, Aklan—Nagapadayun ro pag-upgrade it Department of Public Works and Highways ukon DPWH-Aklan it mga karsada halin sa banwa it Kalibo paagto sa banwa it Altavas ag iba pang daeanon sa western side.
Suno kay Engr. Joey Ureta, maintenance department head it DPWH-Aklan nga ginaduso nanda ro pag-ayos sa mga karsada agud nga maka-engganyo it maabu nga mga turista ag mapadasig ro transportasyon it mga produkto it mga pumueuyu sa probinsiya.
Bangud kara, ginpahayag ni Engr Ureta nga nagapadayun ro concrete reblocking sa pilang section it karsada para sa construction ag bukon it maintenance eamang.
Gina-classify sigon ro karsada nga ‘priority’ kon makitaan eon raya it maabu nga samad.
Ginbuksan eon sigon sa trapiko ro ginkaayad nga karsada sa may capitol site maeapit sa sangka eskwelahan.
Ro mga sarado pa nga karsada apang tapos eon ro pagkonkreto ukon pagsemento hay nagahueat eon lang it “curing” agud nga maabot ro gina-require nga kapag-on.
Mag-eowas sa construction it mga samad nga karsada hay ginakalitan man nanda ro manami nga tiempo agud nga mabutangan it aspalto ro mga karsada nga may lubak-lubak.
Ginatutukan makaron it anang mga tawuhan ro national highway nga sakop it rizal ag unidos sa banwa it nabas matapos nga mahalitan sa pagpanaeasa it bagyong Odette ko nagtaliwan nga dag-on.
Ssa pihak nga parte, gindugang pa ni engr ureta nga owa pa sanda it pondo nga nag-abot makaron nga 2022.
Ro budget allocation sigon it bilog nga region 6 ag iba pang rehiyon hay ginpanabaan ag haeos ¼ eon lang ro nabilin.
Nasayuran nga ko 2021, haeos 50% ro ginbawas sa andang pondo para sa annual maintenance work program.
