KALIBO, Aklan–Nagtau it rekomendasyon ro Department of Public Works and Highways ukon DPWH–Aklan sa sangka contractor nga nagapatigayon it underground cable sa mga national highways it probinsiya.
Raya hay kasunod it pagka-distrasya it mga motorista sa mga gina-obrang excavation ukon pagkutkot kun sa siin ro pinaka-ulihing nabiktima hay si Bombo Daniel Tonel nga nagapabilin sa kritikal nga kundisyon sa sangka ospital sa siyudad it iloilo bangud sa head injury.
Suno kay District Engineer Alejandro Ventilacion it DPWH-Aklan nga pila sa anang mga ginrekomendar hay ro pagbutang it nagakaigo early warning device mga 100 meters ro distansiya sa ginakutkot ag dugang nga device pag-abot it 50 meters agud nga mataw-an it paandam ro publiko.
Dugang pa nga limitahan ro haba it andang installation ag construction.
Dugang pa ni Engr. Ventilacion nga gin-abisuhan man nana ro contractor nga butangan it steel cover ro mga buho kon owa pa it available nga manhole cover.
May nagakaigo suno kana nga permit ro philippine fiber optic nga imaw ro contractor it proyekto para sa magasueod nga third telco sa nasyon nga DITO.
Ginpasiguro man suno kana it kompaniya nga magatau sanda it assistance sa pamilya Tonel.
Nasayuran nga antes ro pagkadisgrasya ni Bombo Daniel sa national highway nga sakop it numancia hay may daywang iba pang motorista ro naaksidente matapos nga mahueog sa buho.
Kabay suno kay Engr. Ventilacion nga indi eon madugangan ro mga madisgrasya sa nagapadayun nga proyekto nga suno kana hay nationwide raya nga ginapatigayon.
