KALIBO, Aklan—Nakamonitor it maabo nga potholes sa mga karsadahon ro Department of Public Works and Highways ukon DPWH-Aklan kasunod it naeksperyensiyahan nga grabeng pagabaha ko Sabado nga adlaw sa pilang ka mga kabanwahan sa bilog nga probinsiya it Aklan tuga it Low Pressure Area ukon LPA.
Suno kay Almond Joy Trinidad maintenance foreman it DPWH-Aklan nga sa makarun hay padayun ro andang monitoring ag pag-inspeksiyon sa mga daeanon kun sa siin hay gilayon nandang paga-ayuson ro makit-an nga grabeng pagbuho it karsada agud nga malikawan ro pilang ka mga aksidente.
Samtang, ginklaro man ni Trinidad nga sigidas ro andang ginahimo nga declogging agud nga mabo-oe ro eutay ag hingko sa andang drainage.
Apang kaabuan sigon sa mga drainage hay puno eun it eutay umpisa pa ko nagtaliwan nga bagyong Frank.
Samtang nagpangayo man raya it pasaylo bangud nga owa eagi sanda nakaresponde samtang nagapadayun ro pagbaha ko adlaw it Sabado bangud maskin nga gustuhon sigon nandang magdeploy it andang mga empleyado hay indi nanda mahimo bangud maging sanda man hay naapektuhan it gulpiyada nga pagbaha.
