KALIBO, Aklan—Plano ni District Engineer Alejandro Ventilacion it Department of Public Works and Highways ukon DPWH-Aklan nga magpatawag it pueong kaibahan ro mga engineering department it nagkaeain-eain nga Local Government Units ukon LGUs nga maeapit sa national highway angot sa baradong drainage system.
Tuyo kara nga magatingub sanda it pwersa agud nga mas pa nga pabaskugon ro clearing operations ag matalakay kon siin pwedeng i-drain ro tubi.
Nasayuran nga hasta makaron hay problema ro mga pagbaha-baha sa mga national highway sa oras nga magbubu ro uean.
Uman raya nga naexperiensiyahan sa pagpanaeasa it bagyong dante ko nagtaliwan nga adlaw.
Ginpahayag ni Engr. Ventilacion nga nagapa-uman-uman ro problema bangud nga maskin sigidas ro construction it mga drainage system ag regular ro paglimpyo it andang maintenance crew hay owa man it ginatumod nga gina-uea-an it tubi ukon drainage outlet.
Bangud kara, importante sigon nga maprotektahan ro mga natural water ways agud nga may maagyan ro tubi-uean ukon baha.
