KALIBO, Aklan—Plano makarun it Department of Works and Highways ukon DPWH-Aklan nga magsumite it proposal nga nagatuyong mabutangan it weighbridge ro national highway sa probinsya it Aklan.
Suno kay Engr. Alejandro Ventilacion, DPWH- Aklan District Engineer nga raya hay bilang sabat sa kontrobersyal ag ginareklamo it publiko nga maabong buho-buho sa national highway maghalin sa banwa it Banga paadto sa banwa it Altavas nga naging rason man it mga aksidente.
Dugang pa kara nga maskin may una eun sandang ginbutang nga daywang ka mga grupo it maintenance agud ayuson ro mga buho sa karsada hay madali eamang nga nagakasamad bangud sa mga mabug-at nga saeakyan nga naga-agi.
Sambilog pa sigon nga rason kara hay ro matubi ro lugar.
Samtang, ginpahayag pa dugang ni Engr.Ventilacion nga posible nandang igapa-check sa andang maintenance engineer kung pwedeng magpatakdan it traffic lights ro mga diversion road sa mga national highway agud makabulig dugang sa publiko.
Ginklaro man kara nga sa makarun hay sigidas ro andang pagtukod it proyekto para makarun nga dag-on 2021 ag posibleng magapreparar man it timparano para sa target nga proyekto sa dag-on 2022.
