KALIBO, Aklan — Plano it Sangguniang Bayan it Malay nga ipatawag sa plenaryo ro mga opisyal it Department of Public Works and Highways (DPWH) partikular si Sec. Vince Dizon matapos ro naging pahayag sa Malacañang nga gina-finalize eon ro kontrata para sa kontrobersyal nga Boracay Bridge Project sa tunga it gobyerno ag San Miguel Holdings Corp.
Raya hay pinaagi sa privilege speech ko nagtaliwan nga session ni Malay SB member Alan Palma Sr.
Madumduman nga sa press briefing sa Malacañang, ginpahayag ni Palace Press Officer Claire Castro nga suno kay DPWH Secretary Vince Dizon, ginasapinal eon ro kontrata para sa proyekto ag ginpasiguro sigon it nasambit nga kompaniya nga pagapamatian ro mga reklamo it lokal nga gobyerno ag stakeholders.
Bangud kara, gusto it mga miyembro it konseho it Malay nga klaruhon kon paalin nga nagsueong ro proseso it proyekto sa pihak it hugut nga pagpamaeabag halin sa lokal nga gobyerno it Aklan ag Malay, environmental groups, ag pilang sektor sa Boracay.
Dugang pa ni Palma nga gusto man nanda nga masayuran kon ham-an nga medyu nauna ro pag-finalize it kontrata kaysa sa mas maeapad nga public consultation ag environmental clearance process.
Ro P7.8-bilyong Boracay Bridge Project hay maga-konektar sa mainland Malay ag Boracay pinaagi sa 2.54-kilometrong tulay.
Padayun nga ginkwestiyon it mga opisyal it Aklan ag Malay ro proyekto bangud sa posibleng epekto kara sa environment, turismo, ag pangabuhian it mga bangkero ag tourism workers.
