KALIBO, Aklan—Plano makaron it Department of Public Works and Highways (DPWH)-Aklan nga magpatigayun it survey para masukat ro kadaeumon it tubi sa Aklan river nga sakop it Brgy. Jumarap, Banga.
Raya hay kasunod it pag-collapse it sangka span it revetment wall sa nasambit nga lugar ko gabi-i it Lunes.
Suno kay Engr. Joey Ureta, Maintenance Division Head it DPWH-Aklan, tuyo kara nga makita ro pundasyon it nasamad nga revetment wall para sa andang paga-ubrahon nga plano kamana man nga ma-estimate ro ginakinahang-ean nga pondo.
Sa kamatuoran suno kana hay nagpatigayun eon sanda it inspeksyon sa lugar ko adlaw it Martes para aktwal nga makita ro naging kasamaran.
Natueopangdan man ni Engr. Ureta nga nagakinahang-ean raya it insigidang aksyon apang owa eon sigon sanda it available resources para sa repair makaron nga dag-on.
Plano man sigon nanda nga tambakan anay ro lugar bilang temporaryo nga solusyon apang owa pa sanda it mabue-an it baeas.
Mag-eowas kara, masyado pang madaeom ro tubi rason nga indi pa makaeusob ro andang backhoe.
Ginabuebanta nga naga-abot sa 20 meters ro nag-collapse nga parte it revetment wall ag ginapatihan nga bangud sa kabaskog it baha rason nga raya hay nasamad.
