KALIBO, Aklan—Puspusan makaron ro trabaho it Department of Public Works and Highways ukon DPWH agud nga makahingabot ro circumferential road sa soft opening it isla sa Oktubre 26.
Ginpahayag ni DPWH Region VI Assistant Regional Director Jose Al Fruto nga kabilugang 1.13 kilometers it pihak nga linya it karsada ro nasemento ag nabutang eon ro 2.91 kilometers nga tubo it drainage pipe sa natapos eon nga 4.1 kilometers nga circumferential road.
Ginaeauman sigon nga ma-deliver eon ro kapin sa 628 nga tubo agud nga matapos eon ro drainage sa unang domingo it Oktubre.
Suno kay Fruto sa oras nga matapos ro pag-install it mga tubo hay igasunod ro pagsemento sa karsada.
Ginpahayag dugang nga ro gap sa circumferential road sa Barangay Balabag hay ginapadasig man agud nga makompleto.
Mag-eowas sa rehabilitation project, ginatutukan man it DPWH ro paghawan sa mga obstructions sa road right-of-way sa main road; pagtaeana it pondo para sa relocation it mga linya ag poste it kuryente; ag pakikipagbueuligan sa mga telecommunication ag water utility providers sa isla agud nga mapadasig ro andang trabaho.
Nasayuran nga nagdugang eon it mga tawuhan sa isla ro DPWH halin sa 15 district engineering offices ag regional office it taeatapan sa Western Visayas.
