KALIBO, Aklan—Mas pang nakaangkon it kaisog nga atubangon ro anang mga pasyenteng may Coronavirus Disease 2019 ukon COVID-19.
Raya ro ginpahayag ni Dr. Joanne Bautista-Abril, sangka infectious specialist it Aklan Provincial Hospital matapos nga imaw ro kauna-unahan nga nagpakuna kontra COVID-19 sa probinsiya it Aklan.
Ginpangunahan it Department of Health (DOH) – Region 6 ro pagbakuna it unang dose it Sinovac sa ceremonial “Resbakuna, Kasangga ng BIDA” Covid-19 vaccination para sa mga healthcare workers sa probinsiya nga ginpatigayon sa Gov. Augusto B. Legaspi Sports and Cultural Center.
Posible suno kana nga imaw ro unang ginsalang nga mabakunahan bangud nga kada adlaw hay pirme imaw sa ICU ag mga ward nga nagatratar sa mga pasyenteng may makamaeatay nga virus.
Samtang, gindugang pa ni Dr. Abril nga nagdesisyon imaw nga magpabakuna agud nga ipakita sa mga health workers nga maskin ano pa ro brand it bakuna hay puro eowas nga gamiton ag owa it dapat nga ikabaeaka.
Gin engganyo man nana ro iba pang health workers nga indi mahadlok , magduha-duha ukon maghueat it iba pang bakuna.
Kinahangean suno kana nga magpasaeamat sa bakuna nga gintau bangud nga raya tanan hay eowas ag epektibo para proteksiyunan ro tanan sa pagsukoe sa COVID-19.
Target nga mabakunahan makaron nga adlaw it miyerkules ro masobra sa 200 nga healthcare workers sa pag-umpisa it roll out it bakuna.
