KALIBO, Aklan–Ginkumpirma ni Dr. Miguel Mac Aposin, Schools Division Superintendent it Department of Education ukon DepEd-Aklan nga ko nagtaliwan nga Biyernes hay nakabaton imaw it order of transfer ag re-assignment halin sa central office.
Mag-eowas kana, may iba pa sigon nga mga opisyal it ahensiya ro igasaylo partikular ro mga na-assigned bilang Schools Division Superintendents sa Western Visayas.
Ro mandu suno kana hay base sa naga-eksister nga polisiya sa pag-angkon it reshuffle kada tatlong dag-on nga pagserbisyo.
Umpisa sa Hunyo 6 hay uman nga magabalik si Dr Aposin sa dating ginhalinan nga division of Capiz.
Magabueos kana si Dr. Feliciano Buenafe nga paga-aywan ro division of roxas city.
Sa pihak nga parte, ginpahayag ni Dr. Aposin nga pila sa pinaka-memorable time nana sa pagserbisyo sa Aklan hay ro tiempo nga ginpatuman ro distance learning bangud sa COVID 19 pandemic kamana man ro pagsaylo it andang opisina sa banwa it Numancia.
Nagakasubo man imaw bangud nga limitado eamang ro mga eskwelahan nga anang nabisitahan sa aklan tuga it mga restrictions nga ginpatuman.
Nasayuran nga si dr aposin hay nagserbisyo sa aklan sa sueod it daywang dag-on ag tunga nga nag umpisa ko Oktubre 2019.
Sa makaron suno kana hay nagapadayun ro andang full-swing nga preparasyon para sa limited face to face classes sa pagbukas it panibag-ong school year sa Agosto 2022.
Masobra eon sa 1/3 it mga eskwelahan ro nagapatigayon makaron it limited in-person classes.
Mabahoe suno kana ro anang pagpasaeamat sa suporta it provincial school board , personnel it division office it Aklan, katapo it media ag iba pa.
