Ginahueat pa hasta sa makaron ni SB member Raymar Rebaldo ro resulta sa draft ordinance nga anang ginaduso angot sa pagpaeawig sa validity period it prangkisa it mga tricycle nga nagabyahe sa banwa it Kalibo.
Suno kana, ginrefer sa committee on transportation nga ginapamunuan ni SB member Matt Aaron Guzman ro anang proposisyon.
Ginpahayag dugang nga maabong Tricycle Operators and Drivers Association ukon TODA ro nagkutana kana kon siin eon naabot ro anang ginaduso nga ordinansa.
May kaangtanan kara, engkaso nga inde gihapon mahueag ro anang proposisyon hasta sa adlaw it Biyernes hay magapangayo eon raya it eksplinasyon sa bise alkalde bangud nga kon may kakueangan ukon may revision sa anang draft ordinance hay willing imaw nga bayluhan ag sundon ro magiging suhestyon it anang mga kaibahan sa konseho.
Madumduman nga ginduso ni Rebaldo ro nasambit nga ordinansa agud nga mataw-an it ligwa ro mga tricycle drivers nga makatipon pa it bastanteng pambayad sa pagrenew it andang prangkisa ag ginpaeawig raya it hasta sa limang dag-on.
