KALIBO, Aklan—Nakataeana nga magpatigayon it dry run ro Philippine Slaughterhouse Management and Operation (PSMO), Inc. kaibahan ro lokal nga gobyerno it Kalibo sa Mayo 23 angot sa renovated slaughterhouse it banwa nga nahamtang sa Brgy. Tinigaw kon sa siin accrredited eon raya bilang double “AA” standard.
Buot hambaeon suno kay Engr. Marlo Villanueva it Municipal Planning and Development Office it LGU Kalibo nga pwede eon maipaguwa sa ibang banwa ro ma-process nga karne sa nasambit nga pasilidad.
Raya nga proyekto hay joint venture sa idaeom it public-private partnership scheme gamit ro PPP Code it Aklan nga gin-adopt it LGU Kalibo.
Ginpaathag dugang ni Engr. Villanueva nga ro nasambit nga private sector ro mataeana it andang mga guidelines kon paano i-operate ro pasilidad ag sanda man ro masukot it pila ka mga fees.
Apang, magapabilin ro naga-eksister nga fees nga para sa LGU.
Ro nasambit nga proyekto hay may kontrata nga kapin sa 25 anyos.
Nasayuran nga mabuhay eon nga handom it lokal nga gobyerno nga makaangkon it standard nga slaughterhouse rason nga nakipagpartner sanda sa pribadong sektor ag ko nagtaliwan nga Hunyo 13, 2019 ginhimo ro groundbreaking ceremony it nasambit nga pasilidad.
