KALIBO, Aklan—Maga-arangkada eon makaron nga adlaw it Lunes, Pebrero 15 ro dry run para sa implementasyon it re-routing ag pay parking sa banwa it Kalibo.
May kaangtanan kara, ginpasiguro it lokal nga gobyerno it Kalibo partikular it Traffic Transportation Management Division ukon TTMD nga uwa it matabo nga daeakpan halin it Pebrero 15 hasta sa 28, 2021 mag-eowas eon lang sigon kon may ibang pag-eabag sa batas trapiko mintras nga ginapatigayon ro dry run.
Nasayuran nga ro implementasyon it re-routing hay uwa ginpadayon ko nagtaliwan nga dag-on bangud sa Covid-19 pandemic ag sa hinyo eon man it mga presidente it TODA ukon Tricycle Operators and Drivers Association.
Sambilog ro re-routing scheme nga ginatan-aw nga tikang ko konseho it banwa agud nga mabuhinan ro pagginutok it mga saeakyan sa mga nagapangunang karsadahon sa banwa it Kalibo.
Samtang, ro panuktan sa Pay Parking hay sa mga oras it alas-7:00 it agahon hasta it alas-4:00 it hapon ag para sa Overnight Parking hay alas-9:00 it gabi-e hasta it alas-5:00 it agahon adlaw-adlaw.
Ro nasambit nga tikang sigon hay mapahagan-hagan ro mga illegal parking kamana man agud nga mahawanana ro daeanon it mga saeakyan ag mismong ana it publiko.
