KALIBO, Aklan — Naging mala-fiesta ro ginpatigayong dry run sa isla it Boracay kahapon, Oktubre 15.
Nauna eon nga ginpahayag ni Caticlan jetty port administrator Niven Maquirang nga gindeklara ni Governor Florencio Miraflores ro dry run nga “Aklan Day” agud mataw-an it kahigayunan ro mga Akeanon nga sanda ro unang makasaksi sa bag-ong hitsura it isla antes ro pormal nga pagbukas kara sa Oktubre 26.
Halin sa Caticlan jetty port, nagdungka ro mga bisita sa front beach sa tatlong gintaeanang boat stations nga nag-umpisa alas-10:00 it agahon.
Ginsug-aeaw ro mga raya it masadya ag makolor nga Ati-Atihan dance performance ag mga opisyal it tatlong barangay.
Kasunod kara, nakaangkon it ribbon cutting sa bag-ong tapos nga circumferential road kapin eon sa bahin it Bolabog Beach ukon back beach nga masaming ginapatigayon ro diving ag water sports activities.
Ro dry run nga magabuhay hasta sa Oktubre 25 hay magapatigayon it assessment ro Boracay Inter-Agency Task Force agud matumod ro iba pang mga kakueangan antes ro soft opening sa Oktubre 26.
