Magaeunsad ro Department of Social Welfare and Development (DSWD) it sangka bag-ong online system nga magapadali ag magapadasig sa proseso it pag-aplay it travel clearance para sa mga minors nga gusto umadto sa ibang nasyon.
Sa sangka press conference kahapon, Pebrero 13, ginpahayag ni Cheryl Mainar, Social Welfare Officer IV it Program Management Bureau (PMB) it DSWD, nga ro inisyatiba ngara hay nagatuyo nga ubrahong mas madasig ag mas accessible ro proseso para sa mga Pilipino. Kun siin indi eon sigon kinahangean pa mag-adto sa mga taeatapan it DSWD ro mga aplikante para magsumite it mga dokumento.
Suno sa ahensya, ro travel clearance hay kinahangean para sa mga minors nga uwa pa sa hustong edad nga mag-adto sa ibang nasyon nga isaeahanon ukon kaibahan ro ibang tawo mageuwas sa andang mga ginikanan ukon legal guardian.
Ginpamilit ni Mainar nga sa paagi it bag-ong sistema, ro proseso it pag-aplay hay mas madasig.
