Ginpaandaman it Department of Social Welfare and Development (DSWD) ro publiko kontra sa mga pekeng dokumento para makaboue it emergency nga bulig maghalin sa ahensya.
Suno sa DSWD nga andang ginapadali ro mga hinyu para sa bulig pamagi sa Assistance to Individuals in Crisis Situation (AICS), apang ginpaandaman ro mga magasumite it mga pekeng documentary requirements hay pagapasakaan it nagakaigo nga penalidad kasunod it nagakadapat nga proseso.
Ro Assistance to Individuals in Crisis Situation (AICS) hay programa it DSWD nga magbulig sa mga indibidwal ag pamilya nga nagakinahangean it inisigidas nga bulig para sa mga serbisyong medikal, eubong, pagkaon, transportasyon, edukasyon,ukon iba pang suporta.
Sa pagtinguha nga pagatigayunon nga mas accessible ro programa, pina-streamline it DSWD ro proseso it programa para masiguro nga ro mga kinahangean hay indi magpabug-at pa sa mga kliyente.
Nauna eon man nga nagpaandam si DSWD Secretary Erwin T. Tulfo nga ro mga fixer ag unscrupulous nga indibidwal nga nakompromiso ro integridad it programa hay magapangatubang sa nagakaigo nga proseso.
