KALIBO, Aklan—Nakapaguwa ro Department of Social Welfare and Development (DSWD) it kapin sa P2.3 billion para sa social pension it kapin sa 385,925 nga senior citizens sa bilog nga Western Visayas para sa unang semester it makaron nga dag-on ukon 99.99 percent nga distribution rate it gina-target nga beneficiaries.
Kada kwalipikadong senior citizen hay nakabaton it P1,000 kada buean ukon kabilugan nga P6,000 para sa unang semester.
Sa probinsiya it Aklan hay may una nga 46,142 nga beneficiaries nga may gintaeana nga pondo nga kapin sa P276.85 million.
Sa ikaywang semester, ginpaabot it DSWD nga pagabayluhan nanda ro andang distribution method sa monthly nga pag release kaysa sa lump sum, agud nga masiguro nga ro mga katigueangan hay may financial support kada buean.
Ro Social Pension for Indigent Senior Citizens program hay sandig sa Republic Act 994 ag Republic Act No. 1191 nga nagatau it P1,000 nga monthly pension agud nga makadugang sa expenses it mga pobre nga katigueangan eabi eon ro mga may sakit, may diperensiya sa eawas, owa it regular income, ag owa nagabaton it anuman nga pension.
Ro pagpatuman it programa hay ginaeakipan it padayun nga validation sa mga may potential nga beneficiaries ag proseso it payout agud nga masiguro nga ro qualified eamang nga senior citizens ro maeakip.
Raya hay kaparte man it commitment it gobyerno nga mabuligan ro pinaka-vulnerable nga pumueuyu pinaagi sa mas ginapabaskog nga social protection measures.