KALIBO, Aklan — Nagpanupod ro Department of Social Welfare and Development (DSWD) pinaagi sa andang Sustainable Livelihood Program ukon SLP it masobra nga P6.7-milyon nga balor it livelihood assistance sa nagkaeain-eain nga asosasyon it mga drug surrenderees ag CAFGUs halin sa nagkaeain-eain nga banwa sa probinsiya it Aklan.
Nasayuran nga ro nasambit nga mga drug surrenderees hay nakatapos it andang community-based rehabilitation and counseling service antes nga nataw-an it nasambit nga pangabuhian.
Agud nga ma-qualify para sa Seed Capital Fund ukon SCF assistance, nagtukod ro mga raya it asosasyon nga accredited it DSWD.
Suno kay Regional Director Restituto Macoto, national program manager it SLP nga ro programa hay magabukas it oportunidad nga makapabag-o it andang kabuhi ag nagaeaum nga masustinir nanda ag mapa-umwad ro pangabuhian.
Samtang, ginpahayag man ni DSWD Undersecretary For Special Projects Mark Allan Jay Yambao nga tuyo man kara nga mapahagan-hagan ro kapigaduhon sa nasyon .
Maskin nga ro nasambit nga assistance hay owa it interest, ro beneficiaries hay obligado nga ibalik ro kwarta nga gintaeana para kanda depende sa andang kasugtanan sa andang asosasyon.
Raya hay agud nga masiguro nga ro SLP hay makaangkon it pondo nga pwedeng magamit it asosasyon.
Nakataeana man nanda nga pagabisitahon ro Ati community sa isla it Boracay makaron nga adlaw it Biyernes .
