KALIBO, Aklan — Temporaryong pagapunduhon it Department of Social Welfare and Development (DSWD) ro pagta-o it cash assistance makaron nga adlaw it Lunes sa mga naapektuhan it Boracay shutdown bangud sa pagka-ubos sigon it cash.
Sa interview it Bombo Radyo, ginpahayag ni Beverly Salazar it DSWD region 6 nga uwa nanda gin-eauman ro pagbuhos it mga trabahador ag residente sa andang operation center nga naga-apply para sa financial assistance halin ko Abril 23 hasta it 26, sa unang adlaw it pagpasara sa isla sa mga turista.
Uwa man sigon it bangko ko Sabado ag Dominggo ag makaron nga adlaw pwedeng ma-proseso ro pagpa-encash.
Suno kay Salazar sa Mayo 1, kadungan it Labor Day celebration, uman nga ipadayon ro andang cash release.
Ro assessment ag interview hay magapadayon man makaron nga adlaw.
Kadungan kara, maga-deploy sanda it dugang nga mga personnel ag igasaylo sa mas mabahoe nga venue agud malikawan ro dueotdutan it mga tawo.
Hasta ko Sabado, Abril 28, naka-release eon sanda it kapin sa P4.9 million para sa haeos 2,229 pa eamang nga displaced workers.
Raya sigon hay ginakaeakipan it transportation ag meal assistance, kun siin nagata-o pa sanda it extra money, depende sa sitwasyon.
Ginatantyang masobra sa 17,000 ro mga naapektuhang registered formal sector workers sa Boracay.
Mag-eowas kara, nagata-o man sanda it bulig sa mga bukon it taga-Boracay nga residente nga gustong mag-uli sa tagsa ka mga probinsiya sa idaeom it andang “Balik Probinsiya Program”.
Magapatuman man sigon sanda it cash-for-work ag Sustainable Livelihood Program para sa mga apektadong residente it Boracay.
Dugang pa ni Salazar nga nagata-o sanda it medical, burial ag educational assistance para sa mga may kompletong requirements.
Samtang, ginklaro kara nga uwa ginakaltasan it buwis ro mga ginata-o nga bulig pinansiyal kabaliskaran sa reklamo it sambilog sa andang naging kliyente.
