KALIBO, Aklan — Nagapadayun ro Department of Social Welfare and Development ukon DSWD sa paglimpyo it listahan it andang benefiaries para sa social pension program ag pagkakas sa pangaean it mga may naga-eksister nga Social Security System ukon SSS ag Government Service Insurance System ukon GSIS pension agud nga mataw-an it kahigayunan ro ibang mga indigent senior citizens nga maka-avail it benepisyo .
Ginpahayag ni Provincial Social Welfare and Development Officer Evangeline Gallega nga ro payouts hay posibleng mapa-isoe pa hasta nga indi makompleto ro validation process.
Apang madali eon lang sigon raya nga matapos ag ginaeauman nga sa Agosto hay maka-release eon.
Gindugang pa ni Gallega nga posibleng by-batch ro pag-release sa tiempo nga ma-clear ro andang pangaean sa cross matching.
Samtang, ro mga senior citizens suno kana hay makabaton eon it andang pension kada semester imbes nga quarterly.
Ginmanduan sigon ro andang ahensiya nga i-validate ro andang beneficiaries matapos ro pilang reports nga may pilang recipients nga bukon it kwalipikado.
Gin-umpisahan sigon nanda ro paglimpyo it listahan ko nagtaliwan nga dag-on ag natukiban nga may una nga mga pensioners it SSS ag GSIS.
Nag-apela man imaw sa mga senior citizens nga may pension ag maka-eusot gihapon sa listahan nga maging honest ag indi eon pagboe-on ro kwarta.
Samtang, gindugang pa ni Gallega sa Western Visayas hay pitong LGUs eon ro nataw-an it pondo para kara.
Ro Social Pension Program hay nagatau it bulig pinansiyal sa indigent nga mga magueang base sa Expanded Senior Citizens Act of 2010 ukon Republic Act 9994.
