KALIBO, Aklan—Haom eon ro Department of Social Welfare and Development ukon DSWD region VI sa pag-augment sa anuman nga kinahang-eanon nga relief assistance nga igarequest it mga lokal nga gobyerno angot sa bagyong Betty maskin nga uwa raya it direktang epekto sa rehiyon.
Suno kay Therese Fely Legaste, information officer II it disaster response management division nga nakapreposition eon ro andang stock file sa mga warehouses it kabilugan nga 69,841 family food packs nga nagabalor it haeos P44.8 milyon pesos as of alas-5:00 it hapon, adlaw it Biyernes.
Mag-eowas kara, preparado eon man ro mga non-food item assistance nga ginakaeakipan it family kit nga may kabilugang haega nga P42.4 milyon pesos family.
Raya hay intended para sa mga bakwit engkaso gidman nga maapektuhan it bagyo ro rehiyon.
Uwa suno kana ginapangayu-a nga tamaan it bagyo ro rehiyon apang kinahang-ean sa gihapon nga magpreparar agud nga may ikata-o insigidang ayuda sa mga posibleng maapektuhan nga pamilya.
Samtang sa pihak nga parte, nagapadayon ro relief assistance operation it DSWD sa Caluya, Antique nga tinamaan it oil spill maghalin sa nag-eogdang nga barkong MT Princess Empress ko buean it Pebrero sa Naujan, Oriental Mindoro nga umabot hasta sa kaeawran nga sakop it nasambit nga banwa.
Suno kay Legaste, masobra sa 7,000 nga pamilya eon sigon ro andang naserbisyuhan maghalin sa ap-at nga barangay it Caluya.
Nagaabot sa masobra sa P100 milyon pesos nga haega it ayuda ro naipanupod it gobyerno pinaagi sa family food packs, cash for work, unconditional cash transfer, ag maabong iba pa.
Ro eubus nga nakabenepisyo kara hay ro mga apektadong mangingisda ag ro iba pang ro andang pangita hay nagahalin sa naapektuhang kaeawran.
Sa makaron suno kana hay amat-amat eon nga nagabalik ro andang pangabuhian.
