Kalibo Aklan ——Ginkumpirma ni Ibajay Mayor Jo-en Miraflores, Presidente it League of Municipalities – Aklan Chapter nga nagpangayo kanda it pasaylo ro Department of Social Welfare and Development (DSWD0 Region VI bangud sa nahimo nga pagkasaea sa numero it pagataw-an it bulig sa idaeum it Social Amelioration Program (SAP).
Raya hay matapos nga bawasan ro alokasyon para sa beneficiaries it nasambit nga programa.
Suno kay Mayor Miraflores nga dapat ro Regional Office ro magpaathag ag magpangayo it apology sa publiko angot sa andang lapses.
Gindugang pa it Alkalde nga nabutang sanda sa aeang-aeang nga sitwasyun matapos nga gin-anunsyo eon sa andang mga constituents ro numero it mga makabaton it financial aid para sa mga naapektuhan it ginpatuman nga Enhanced Community Quarantine tuga it coronavirus disease (COVID-19).
Samtang, sangka sueat sigon ro andang nabaton halin kay DSWD Regional Director Ma. Evelyn Macapobre bangud sa natabu nga miscommunication .
Ginpahayag pa ni Miraflores nga ko nagtaliwan nga domingo hay ginpahisayod kanda nga ro numero it SAP beneficiaries nga nauna eon nga gintaeana sa kada Local Government Unit (LGU) sa Rehiyon hay saea bangud nga owa naeakip sa andang listahan ro mga beneficiaries it Pantawid Pamilyang Pilipino Program (4P’s) nga dapat hay kaibahan sa andang total target beneficiaries .
Obligado sigon makaron ro kada banwa nga bag-uhon ro andang listahan .
Apang nagakabaeaka nga ro mga Barangay Officials ag sanda nga mga mayors ro mabasuean bangud sa nasambit nga saea it ahensiya .
Sa idaeum it SAP guidelines, ro cash subsidies para sa 4Ps beneficiaries hay igapaagi sa andang cash cards ag indi eon iga-download sa mga LGUs.
Sa bilog nga Region VI, ro cash assistance para sa nasambit nga programa hay P6,000 pesos kada pamilya.
Nasayuran nga ro lapses hay iya eamang natabu sa Western Visayas.
