KALIBO, AKLAN — Nag-ala-Mike Tyson ro sangka foreman matapos kara nga angkiton ag nautod ro waeang dueonggan it katrabahong mason bilang self-defense kat atakihon imaw kara sa sueod it andang barracks sa Brgy. Yapak sa isla it Boracay.
Padayon nga ginatugis it Boracay Tourist Assistance Center (BTAC) ro suspek nga si Niel Trinidad, residente it Roxas City, Capiz.
Samtang, ro biktima hay nakilaeang si Jerry Abayon, 33, residente man it nasambitang probinsya nga nagaeaum pang masugpon ro nautod nga dueonggan.
Base sa imbestigasyon, may ginatagong kaakig ro mason sa foreman bangud permi sigon imaw kara nga ginapag-initan kon sa siin bisan sa sueod eon it andang barracks ag tapos eon ro oras it trabaho hay ginapangisgan sa gihapon imaw kara.
Hilong nga nag-uli ro biktima ag gin-atake ro suspek kabangdanan nga nagdueomugan ro daywa ag naglinigid sa eogta.
Bangud sa mas mabahoe ro mason ag dehado eon ro foreman hay gin-angkit eon lang kara ro dueonggan it biktima nga nagresulta sa pagkautod.
