KALIBO, Aklan–Mas pang nadugangan ro mga eskwelahan sa probinsya it Aklan nga magapatigayun it limited face-to-face classes matapos nga aprubahan it regional office it Department of Education ro request it kapin sa 86 nga mga eskwelahan.
Suno kay Dr. Miguel Mac Aposin, Schools Division Superintendent it Deped-Aklan nga kaabuan sa mga raya hay pampubliko ag pila eamang ro mga pribadong eskwelahan.
Sa kabilugan, naga-abot eon sa 121 ro mga eskwelahan sa bilog nga probinsya nga ginpasugtan nga magpatigayun it in person classes.
Ginpahayag ni Dr. Aposin nga maabu pang eskwelahan ro nagahueat it pag-apruba halin sa regional office samtang ro iba hay padayun sa pagproseso.
Nakataeana sigon nga magpatuman it limited face-to-face classes ro 86 nga dugang nga mga eskwelahan makaron nga dominggo ag ro iba hay sa masunod nga dominggo.
Ginkalipay man it taeatapan ro amat-amat nga pagbalik it in person classes agud nga mapaeapad ro edukasyon ag matutukan ro kasayuran it mga estudyante.
Natueopangdan nga nakataeana nga magtapos ro School Year 2021-2022 sa Hunyo 24.
Ginpasiguro man ni Dr. Aposin nga pagatinguhaan nanda nga mapun-an pa ro pilang ka mga problema makaron nga dag-on agud nga mas pang maging maayos ro daeagan it pagtinueon-an sa masunod nga school year.
Sa pihak nga parte, ginkalipay man ni Dr. Aposin nga naging madinaeag-on ro kakatapos eamang nga eleksyon.
Suno kana, owa it nailistang problema ro DepEd-Aklan sa mga manugturo nga nagserbing Board of Election Inspectors.
Samtang, una eon man sigon sa proseso ro pagtao it honoraria sa mga manugturo nga nagserbi ko May 9 elections.
