KALIBO, Aklan — Gina-expectar nga mas maabo pa nga flights ro magatugpa sa Kalibo International Airport (KIA) umpisa makaron nga Abril.
Sa interbyu it Bombo Radyo Kalibo kay Civil Aviation Authority of Philippines ukon CAAP-Aklan Manager Engr. Eusebio Monserate Jr., umpisa ku Abril 1 hasta sa Oktubre 31 makaron nga dag-on hay mas magadugang pa ro mga flights sa KIA.
Base sa datus it Kalibo International Airport, maabo eon ro mga turista nga sakay it mga international flights ro nagahugpa sa paeuparan.
Ginpahayag ni Monserate nga kadungan man raya it pag-umpisa it summer season.
May kaangtanan kara, nagdugang man sigon it mga flights ro ibang mga airlines rason nga maabo ro mga pasahero nga nailista makaron it KIA partikular ro mga foreign nationals.
Sa idaeom man raya it summer schedules nga gina-offer it tagsa ka mga airlines kung siin kaeabanan sa mga pasahero hay nagapadueong sa isla it Boracay agod nga magpatigayon it bakasyon makaron nga summer.
Nasayuran nga ro average flights sa kalibo internatiopna airport hay 26 ka international flights ag 9 ka domestic flights kada adlaw.
Sa pihak nga parte, bangod sa gina-expectar nga pag gutok sa Kalibo Internationa Airport kadungan it pagdagsa it mga pasahro, ginpahayag ni CAAP-Aklan Manager Engr. Eusebio Monserate Jr., nga may iga-implementar sanda nga scheme.
Sigurado gid suno kay Monserate nga maga dagsa ro mga pasahero sa passenger terminal building eabi eon sa international flights.
Sa nasambitan nga scheme ukon plano, pagahueayon ro mga pasahero kung siin ro iba hay magatinir anay sa pila ka mga lounges samtang ginaproseso ro andang pagcheck-in.
Katuyuan kara nga mas mangin manami ro daeagan it Kalibo International Airport eabi eon sa pag-akomodar it mga pasahero ag turista.
