KALIBO, Aklan—Uman nga nag-apela sa kaparehong opisyales si Kalibo Sangguniang Bayan member Agosto Tolentino nga talakayon ag aprubahan ro anang ginaduso nga resolusyon kaangot sa pag-angkon it dugang nga quarantine facility.
Raya hay kasunod it padayon nga paglobo it kaso it mga tinamaan it coronavirus disease ukon covid-19 sa banwa it Kalibo.
Suno kana, importante eon nga makaangkon it dugang nga quarantine facility agud nga ma-isolate ro mga kumpirmadong covid-19 patient.
Sandig sigon sa guidelines ag protocols it National Inter Agency Task Force against Covid-19, inde pwede nga i-isolate eamang sa sueod it baeay ro mga pasyente bangud nga may posibilidad nga matapnan ro andang pamilya.
Ginpahayag dugang ni Tolentino nga raya eon ro tyempo agud nga maghueag ro mga opisyales bangud nga nakakaalarma eon ro padayon nga pagtinaas it kaso it sakit sa nasambit nga banwa.
Nasayuran nga ro banwa it Kalibo hay nakalista eon it 46 ka mga kumpirmadong kaso it deadly virus kon sa siin sa nasambit nga numero hay an-om eon ro namatay.
