KALIBO, Aklan – – – Gin manduan ni Department of Environment and Natural Resources (DENR) Sec. Roy Cimatu ro Boracay Island Water Company (BIWC) nga madalion ro konstruksiyon it dugang nga sewerage line sa isla it Boracay.
Suno kay Acs Aldaba, Business Operations Head it BIWC nga tinotuyo it dugang nga linya hay agud masabat ro problema sa sewerage sa isla.
Gin hayag ni Aldaba nga naga abot sa 11.5 million liters capacity per day ro masarangan nga ma-treat nga sewage it andang Sewerage Treatment Plant (STP).
Apang, naga abot eamang sigon sa 7.5 million liters ro nakokolekta it andang planta nga nagahalin sa mga nakakonekta sa andang planta.
Samtang, aminado man ro BIWC nga naga kaangkon it overflow ro andang mga manhole bangud pwersahang gina-pump it mga nakakonekta ro sewage wastes sa andang tubo.
Gin pasiguro man ni Albada nga Class SB ro classification it andang treated wastes nga naga kadapat sigon sa sangka body of water nga ro utilization hay para sa recreational activity.
Gin hayag man kara nga nga gina paagi nanda ro treated wastes sa andang tubo sa distansiya nga 810 meters maghalin sa bibi it baybayon.
Nasayuran nga kaina hay nakaangkon it closed door meeting sa tunga ni Cimatu, alkalde it Malay, gobernador it probinsiya ag mismong taga-BIWC nga gin patigayun sa isla kun siin tinalakay ro problema ag mga posibling maging solusyon kara.
