Posibleng makaangkon it dugang nga sweldo ro mga minimum wage earners sa Western Visayas bago matapos ro 2026, kasunod it mga proposisyong dugang nga ₱40 hasta ₱60 kada adlaw.
Suno kay Department of Labor and Employment (DOLE)-6 Regional Director Atty. Sixto Rodriguez Jr., nakasalalay gihapon sa Regional Tripartite Wages and Productivity Board (RTWPB-6) ro pinal nga haega ag petsa it pagpatuman kara.
Sa ginpatigayon nga konsultasyon, may mga sektor nga nagsuhestyon it ₱50 nga dugang sweldo samtang may mga employer nga naghinyo nga ipaiway anay raya sa 2027 bangud sa pagtaas it presyo it langis, inflation ag iba pang gastuson sa negosyo.
Posibleng maipaguwa ro bag-ong wage order pagkatapos it Nobyembre 19, 2026.
Sa makaron, kapin sa ₱550 kada adlaw ro minimum wage sa mga non-agricultural establishment nga may masobra sa 10 trabahador, ₱525 sa mga establisimyentong may 10 trabahador panaba, ag ₱520 para sa mga trabahador nga agrikultural.
Igapatigayon mat-a sa banwa it Malay sa Oktubre 20 ro ulihing nakataeanang public hearing bago tun-an ro wage board ro mga proposisyon ag magdesisyon sa nagakadapat nga dugang sweldo.
