KALIBO, Aklan—Gin-aprubahan it Sangguniang Bayan it Kalibo sa andang ginpatigayun nga session ro sangka draft resolution nga naga-request sa Department of Public Works and Highways (DPWH)-Aklan nga mag-install it traffic light sa corner it Cardinal Sin Avenue ag Airport Road, Brgy. Pook, Kalibo.
Tuyo sigon kara nga maging maayos ro daeagan it trapiko sa nasambit nga daeanon kamana man nga malikawan ro pilang ka mga aksidente.
Nakikita man it lokal nga gobyerno nga magiging paborable raya sa parehong motorista ag residente nga naga-agi sa nasambit nga lugar.
Sa pihak nga parte, gin-aprubahan man ro sangka draft resolution nga naga-request kay Kalibo Mayor Emerson Lachica nga mag-alokar it pondo para sa pagbakae it bueong kontra sa COVID-19 ag iba pang variant.
Raya hay kasunod it gulpiyadang paglobo it mga kaso daea it Omicron variant.
Tuyo sigon kara nga makaangkon it bastante nga suplay it bueong ro banwa kaibahan ro mga kabarangayan eabi pa ag nagakaubusan eon ro mga flu medicine sa mga botika sa pilang lugar sa nasyon.
