KALIBO, Aklan — Nagapasaeamat ro Philippine Red Cross (PRC) Aklan Chapter sa padayun nga pagsuporta it publiko sa dag-unan nga Dugong Bombo nga may temang “A Little Pain, a Life to Gain,” nga nagatuyo nga paeaparon pa ro kasayuran it mga pumueuyu sa importansiya it pag-donate it dugo.
Suno kay Ace Phil Feliciano, Donor Recruitment Officer it PRC Aklan Chapter, mabahoe nga bulig ro dag-unan nga aktibidad agud nga maengganyo ro mas maabung tawo nga maging blood donor ag maeubtan nga ro simpleng pagtau it dugo hay pwedeng makasalbar it kabuhi.
Ginpahayag pa ni Feliciano nga ginapahauman gid nanda ro aktibidad bangud sa kaabuon it mga donor nga nagapasakop kara.
Tiempo man suno kana ro pagpatigayon it Dugong Bombo kada buean it Nobyembre bangud sa nagahilapit nga sunod-sunod nga holiday ag iba pang okasyon, kun sa siin, kaeabanan nga naga-naba ro numero it mga nagatau it dugo.
Ginpamilit pa kara nga owa nagapundo ro pagkinahangean it dugo, eabi eon para sa mga pasyenteng nagakinahangean it pagsalin kara ukon blood transfusion sa mga ospital.
Sa makaron hay may bastante pa sigon nga suplay it dugo ro PRC Aklan Chapter ag nagpadaea eon man it mga blood stocks sa mga ospital agud nga masabat ro pagkinahangean it mga pasyente.
Aminado man imaw nga nakaangkon sanda it mabahoe nga challenge nga mapabilin ro bastante nga supply it dugo ko nagtaliwan nga daywa hasta tatlong buean bangud sa dengue season nga nagtuga it pagtaas it pagkinahangean it dugo.
Gin engganyo man ni Feliciano ro publiko nga regular nga mag-donate it dugo, bangud nga mag-eowas sa pagbulig sa mga pasyenteng nagakinaheangean, may mga benepisyong pang-ikamayad nga eawas man para sa mga kwalipikadong donor.
