KALIBO, Aklan—Ginapasaeamatan it Philippine Red Cross Aklan Chapter ro kada dag-on nga pagpatigayon it Dugong Bombo bangud nga nakakabulig raya sa dere-deretso nga pagtipon it bastante ag eowas nga dugo bukon eamang sa aklan kundi sa bilog nga nasyon.
Suno kay Mary Joe Gallon, administrator PRC Aklan Chapter nga sa makaron hay maabu gihapon ro mga pasyente nga nagakinahangean it blood transfusion rason nga importante ro ginatawag nga voluntary blood donation.
Angot kara, ginakangay ni Galleon ro tanan nga mga Aklanon nga makibuylog sa Dugong Bombo 2024 nga may temang “ A Little Pain, A Life to Gain” sa maabot nga Nobyembre 16 sa 2nd floor it Gaisano Grand Mall.
Ginapahauman sigon nanda pirme ro pagpatigayon it Dugong Bombo bangud nga ginakilaea raya bilang madugo nga blood donation drive tuga it pagdagsa it mga blood donors.
Ginpahayag dugang nga bangud nga indi kita makasarang nga mag-obra it dugo rason nga ro sangka pamaagi agud nga masiguro nga makaangkon it bastante nga supply it eowas nga dugo hay pinaagi sa bulig it mga pumueuyu base sa regular ag boluntaryong blood donation.
Mabahoe sigon nanda nga partner ro Bombo Radyo Philippines sa pagpatigayon it blood donation drive ag pagtau it mga impormasyon angot sa importansiya it pag-donate it dugo.
