NATIONAL News—Gin-engganyo ni Pangueong Rodrigo Duterte ro mga kaparehong lider it mga nasyon nga miyembro it United Nations (UN) nga kondenahon ro planong pagpatigayun it booster shots it pilang gamhanan nga nasyon sa kalibutan.
Sa anang diskurso sa High Level Debate it 76th Session it United Nations General Assembly (UNGA), gintaw-an it punto ni Pangueong Duterte nga haeos daywang dag-on eon ro pagpanaeasa it COVID-19 pandemic apang mas pang naga-daeom ro bukon it pagiging patas it sitwasyon.
Suno kana, ro mga gamhanan eamang nga nasyon ro masami nga nagapanimpueos sa mga bakuna kontra sa COVID-19 samtang ro mga pigado nga nasyon hay nabudlayan man sa pagbuoe kara it suplay.
Bukon sigon it tama nga istoryahan eon it pilang nasyon ro pagturok it booster shot bangud maabo pang pigadong nasyon ro sangkiri paeang ro nabakunahan sa andang populasyon.
Gin-engganyo man ni Duterte ro kaparehong lider nga suportahan ro COVAX facility.
Nagapati imaw nga sa rayang pamaagi hay mas maabo nga kabuhi ro mai-eowas sa padayun nga paeag it pandemya.
