KALIBO, Aklan—Ginklaro it Maintenance Section it Department of Public Workd and Highways ukon DPWH-Aklan nga owa pa sanda it standby funds para sa pag-repair it pila ka mga imprastraktura nga nagkaeasamad tuga it kalamidad ko nagtaliwan nga dag-on.
Suno kay Engr. Joey Ureta, Chief it Maintenance Section it DPWH-Aklan nga padayun ro andang pag-request it pondo pinaagi sa Regional Office hasta sa Central Office it ahensya para maeakip sa budget ro natungdan nga mga proyekto makaron nga 2022.
Partikular nga gintumod ni Engr. Ureta ro naguba nga porsyon it karsada sa bahin it Brgy. Rizal ag Unidos sa banwa it Nabas kamana man ro nasamd nga seawall sa Brgy. Tambak, New Washington ag pilang revetment wall sa Banga, Kalibo, Buruanga ag Malay.
Ginabuebanta nga naga-abot sa P25 million ro ginakinahang-ean nga pondo sa pag-ayos it nasamad nga seawall.
Ginpahayag ni Engr. Ureta nga puro temporaryong solusyon eamang ro andang ginpatigayun sa mga natungdan nga proyekto bangud owa pa it haum nga pondo.
Dugang pa kara nga ubos eon ro andang quick response fund ko ulihing quarter it 2021.
Nagaeum sigon sanda nga mai-eakip sa budget ro mga natungdan nga proyekto agud nga maumpisahan eon ro konstruksyon sa mas madali nga panyempo.
