KALIBO, Aklan—Nag-positibo sa Coronavirus Disease 2019 (COVID-19) ro sangka 47-anyos nga e-trike driver nga imbes nga i-cremate hay gin-eubong eon lang.
Ro eaeaki hay gindeklarang dead on arrival sa Don Ciriaco Tirol Memorial Hospital sa isla it Boracay ko gabi-i it Abril 20, 2021 matapos nga atakehon sa tagipusuon sa andang baeay sa Sitio Ambulong, Barangay Manocmanoc sa nasambit nga isla.
Base sa hinyu it pamilya, ginpabilin pa sa ospital ro anang bangkay nga ginbutang sa cadaver bag samtang ginahueat ro resulta it swab test agud nga masiguro ro matuod nga rason it anang pagkamatay.
Apang ko Huwebes, Abril 22 nagguwa ro resulta it eksaminasyon sa eaeaki nga imaw hay ginkapyutan it virus.
Owa eon raya na-cremate ag bandang alas-7:00 it gabi-i insigida raya nga gin-eubong sa Manocmanoc Public Cemetery sa bulig it mga tawuhan it MDRRMO ag sanitation team it LGU-Malay kaibahan ro Philippine National Police ag Barangay Council.
Ginduea man it Municipal Health Office ro pagkabaeaka it publiko bangud nga sandig sigon sa ginapatuman nga sanitation protocol ro pag-eubong it bangkay sa eugta sa kadaeumon nga 6 feet.
Ginatumod pa makaron it mga awtoridad ro mga nakasalamuha it eaeaki agud nga matapna ro pagkalhit it virus.
Raya eon ro ikaywang namatay nga COVID-19 positive sa Boracay.
