KALIBO, Aklan — Patay ro sangka eaeaki matapos nga daywang beses nga masagasaan it kotse ag truck sa Brgy. Naisud, Ibajay, Aklan.
Gin kilaea ro biktimang si Ronald Magsael, 35, sangka laborer ag residente it nasambitang lugar.
Suno kay PO1 Donald Alvarado it Ibajay Police Station, naga tindog sigon ro biktima sa tunga it karsada, owa it eambong nga pang ibabaw ag medyu hilong pasado alas-6:00 kabie.
Gina sugid nga naga patawid ro eaeaki kat matabo ro aksidente.
Matapos masagasaan it kotse nga ginamaneho it sangka babaye nga nagpamalibad nga magpabanggit it pangaean, tumambabo ro biktima sa likod it saeakyan.
Uman pa rayang nasagasaan it kasunod nga truck nga nagresulta agud maeunot ro anang ueo apang, sa baylu nga magpundo ro driver, nagpaharurot pa raya it paeayo.
Sa makaron hay sa kustodiya eon it kapulisan ro babayeng driver samtang padayun pang gina tugis ro truck nga nakasagasa sa biktima.
