KALIBO, Aklan—Magapangatubang sa kasong Malicious Mischief ro sangka eaeaki matapos nga ginpangwasak kara ro katre ag lamesa nga ginapanag-iyahan it Madalag Police Station.
Ginkilaea ro suspek nga si Jomari Nabor, 31-anyos ag residente it Brgy. Alas-as, Madalag.
Base sa report, ginpakustudiya it andang pamilya sanday Nabor kaibahan ro manghod kara nga si Jovani Nabor, 24-anyos matapos nga nag-ilinaway sa andang panimaeay nga ginhiwatan it birthday party.
Nagbaeaywan sigon ro daywa bangud nga una ro mga raya sa idaeom ko impluwensya it aeak ag may nauna eon sandang bagina ko nagtaliwan nga dominggo.
Kaangot kara, gindaea it mga kapulisan sa andang taeatapan ro daywa apang si Jomari hay nagwala idto rason nga pagakahusan raya it pulisya para sa nagakaigong disposisyon.
