KALIBO, Aklan—Arestado ro sangka eaeaki kasunod it ginkasa nga operasyon it mga otoridad sa Brgy. Jugas, New Washington.
Nakilaea ro suspek nga si Romy Moranio y Nabor, sa legal nga edad, residente it Brgy. Dumaguit sa nasambit nga banwa.
Narekober sa sueod it bag ni Moranio ro sangka baril, pilang mga bala, kwarta ag sangka dollar, sigarilyo, lighter, face shield ag cellphone.
Kaangot kara, hugut man ro pagpamalibad it suspek ag ginpamilit nga bukon it ana ro nakita nga baril.
Ginpanindugan man kara nga planted ro baril ag pilang mga bala nga nabuoe sa bitbit kara nga bag ag ro kwarta sigon nga nakasueod kara hay maghalin sa anang asawa.
Suno kay Moranio, nagpaiba eamang kana ro anang barkada nga nakilaea kay certain “potpot” nga mag-adto sa sambilog karang barkada nga naga-istar sa sambilog sa mga housing unit sa nasambitang lugar para maghueam it 5,000 pesos.
Gindugang pa kara nga magabayad eon kunta imaw it anang motorsiklo matapos nandang mag-adto sa pabahay apang owa sigon nana ginaeauman nga papunduhon imaw it mga operatibo ag paga-arestuhon.
Samtang, ginhangkat man kara ro mga otoridad nga ipaidaeom sa fingerprint ro narekober nga baril.
