VENTURANZA, Banga – Ginasapnay it anang asawa ag duguan ro sangka eaeaki nga biktima it pagpamaril sa Brgy. Venturanza, Banga, kaina nga hapon.
Ginkilaea ro eaeaki nga si Rommer Salvador De Juan, 42-anyos ag residente man it nasambitan nga lugar.
Pagsugid ni Brgy. Kapitan Arnulfo Pastrana nga alas-4 it hapon kat gintawag imaw it anang unga nga may ginbaril sa andang tungod kun siin makita pa ro mga empty shells it baril.
Panaysayon ni Pastrana nga may nakit-an nga mga eaki nga nakatambay nga nakahelmet ag nakajacket sa nasambitan nga lugar.
Duda nanda nga ginbantayan gid sigon it mga suspek ro biktima.
Panindugan ni Pastrana nga uwa it record ro eaeaki ag uwa it nakaka-away sa andang barangay.
Samtang, pahayag ni Maria Jel De Juan ro bayaw it biktima nga bago anay ro pagpamaril hay halin sa Kalibo ro biktima ag ro anang asawa bangud nagpacheck-up.
Pagsaysay man nana nga base sa mga nakakita sa mga suspek nga raya hay nakamotor it rusi, nakajacket ag maniwang ro sambilog nga suspek.
Pagsalarawan man nana nga mabuot ro anang bayaw ag uwa gid it record sa barangay.
Ginapatihan nga sa dughan ro tama it biktima rason nga haeos kumalat eun ro anang dugo sa nasambitan nga lugar.
Base sa mga nakasaksi nga waeaong eupok sigon it baril ro andang nabatian.
Samtang, padayon pa ro ginahimo nga imbestigasyon it mga kapulisan.
