KALIBO, Aklan — Patay ro sangka28 anyos nga eaeaki matapos nga bun-on it unga it ka-relasyon nga sangka persons with disability (PWD) sa sueod it andang baeay sa Brgy. Camanci Sur, Numancia, Aklan.
Dead-on-arrival sa Aklan Provincial Hospital ro biktimang si Enrique Villanueva, sangka laborer ag residente it nasambitang lugar bangud sa madueom nga nina sa tuo nga parte it anang likod.
Matapos ro sang adlaw nga hot pursuit operations, naaresto man it mga pulis ro suspek nga si Ryan Domingo, 26, putoe ro waeang alima, ag naga estar sa Brgy. Balabag, Boracay.
Suno kay PO3 Felizardo Navarra it Numancia Police Station, binisita sigon it suspek ro anang ina ag samtangn nga sa inuman hay nagsugid ro sambilog sa mga igmanghod kara nga gina sakit it andang madrasto ro iba pa karang mga maisot nga manghod nga sa poder it andang 46 anyos nga ina nga gin kilaeang si Gloria Domingo.
Naakig sigon ro suspek ag gin salakay ro madrasto kamana man nga gumabot it kutsilyo ag gin buno sa likod nga nangin rason it anang kamatayun.
Pagkatapos kara hay madasig nga nagpaeagyu ro suspek bitbit ro ginamit nga kutsilyo.
Gina sugid nga owa man naga pamaeabag ro suspek sa pagkaangkon it relasyon it andang 46 anyos nga ina sa sangka 28 anyos nga eaeaki.
Padayun nga nagapatigayun it imbestigasyon ro kapulisan sa nasambitang insidente.
