KALIBO, Aklan—Patay eon kat nasapwan ro sangka 34-anyos nga eaeaki matapos nga ginbaril sa Brgy. Cayangwan, Makato, Aklan.
Nakaangkon it fatal nga lastro sa uyahon ro biktimang si Jhonny Taglay matapos nga ginbaril it ginatumod nga suspek nga si Rodel Tambong, 37-anyos ag parehong residente it nasambitang lugar gamit ro 12 gauge shot gun.
Suno sa anang igmanghod nga si Marissa Taglay, natabo ro insidente bandang alas-9:00 it agahon apang alas-11:00 eon kat nakit-an nga nagahamyangon ag uwa eon it kabuhi ro anang magueang.
Ginpahayag dugang nga halin sa bisperas it kapyestahan sa Brgy. Libang ro biktima kon sa siin imaw nagbulig it pagpatay it baboy.
Magabalik pa kunta imaw sa baeay kon siin imaw naagahan apang uwa eon raya nakabalik bangud nga nasapwan eon lang nga nagapaligos sa kaugalingon nga dugo sa unahan it andang panimaeay.
Samtang, ginkumpirma ni P/Major Belshazzar Villanoche it Makato Police Station sa andang inisyal nga imbestigasyon nga positibong nag-ako ro suspek nga imaw ro responsable sa pagpatay sa biktima.
Ginpahayag dugang nga mismong si Tambong ro nagkumpisar sa pulisya sa anang krimen nga nahimo apang ginklaro kara nga uwa pa sanda it matumod nga eye witness sa insidente.
Ginpahayag sigon it suspek nga may nagpatunga kanda nga diskusyon it biktima samtang naga-inuman hasta nga naka-uli ro mga raya kon sa siin umabot sa punto nga ginbayo imaw ni Taglay ag ginsalakay pa gamit ro sangka espading.
Ro insidente hay padayon pang ginaimbestigahan it pulisya.
