KALIBO, Aklan — Patay ro sangka eaeaki matapos nga barilon sa ueo sa Brgy. Camanci, Batan.
Ginkilaea ni Police Captain Alfonso Manoba Jr. it Batan Police Station ro biktimang si Anthony Balagasay samtang ro suspek hay ginkilaeang si Raul Nicolas, parehong sa legal nga edad ag mga residente it nasambit nga lugar.
Base sa inisyal nga imbestigasyon it pulisya, nakasakay sa motorsiklo ag pagtungod sigon kara sa suspek hay gilayon imaw nga ginbaril sa ueo nga imaw ro naging kabangdanan it anang hinali nga kamatayon.
Insigidang ginkamatay it biktima ro anang tama it bala sa ueo.
Pagkakita it suspek nga nagakueob eon ro biktima hay gilayon man raya nga nagpaeagiw.
Ginapatihan nga 12 gauge shotgun ro ginamit it suspek sa pagbaril kay Balagasay.
Ro insidente hay padayon pa nga ginaimbestigahan it Batan PNP matapos nga boluntaryo nga nagsurender ro suspek nga si Nicolas sa Batan PNP.
Ginasugid nga bangud sa land dispute ukon away sa eugta ro ugat it insidente.
