Kalibo Aklan —–Nagapadayun pa ro imbestigasyon it New Washington Police Station angot sa pagbuno sa sangka eaeaki sa guwa it sangka bar sa Brgy. Tambak, New Washington.
Nakaangkon it madaeum nga lastro sa leog ro biktimang si Lerwin Andrade, 21-anyos, residente it Brgy. Caano, Kalibo matapos nga ginbuno it owa pa makilaeang indibidwal sa nasambitang lugar.
Base sa inisyal nga imbestigasyon it pulisya, pasado alas 10 kabi-i kat magsaeampitan ro biktima kaibahan ro anang iba pang barkada ag igkampod para mag-inum kung siin waeong bilog sigon sandang nag-adto sa nasambitang bar.
Pag-abot it ala una kainang aga-aga hay nauna it guwa ro biktima kaibahan ro daywa nanang kaibahan para magbuoe it motorsiklo.
Sa owa magbuhay nakibot eon lang ro sambilog sa andang kaibahan kat makita karang nagadaeagan ro sambilog nga kaibahan sa pagbuoe it motorsiklo it biktima.
Mabahoe ro pagpati it sambilog sa kaibahan ni Andrade nga basag nga bote ro ginamit sa pagbuno kana bangud may mga basag nga bote nga nakit-an idto sa lugar.
Samtang, owa man sigon raya it nakaalitan sa sueod it bar antes natabo ro insidente.
