KALIBO, Aklan — Naninahan ro sangka 20-anyos nga eaeaki matapos nga eab-on it makapilang beses it sangka owa pa nakilaea nga mga suspek bandang alas-11:50 it gabi-i it Huwebes sa Brgy. Cabatanga, Makato.
Padayun nga naka-confine sa Aklan Provincial Hospital ro biktimang si Jonel Piano ag residente it nasambit nga lugar.
Suno kay Monica Piano, magueang it biktima nga natabu ro insidente samtang nagapa-uli eon kunta ro anang manghud sa andang baeay sakay it anang motorsiklo halin sa sangka bunyag sa Brgy. Calimbajan sa nasambit man nga banwa.
Ginasugid nga gin-eambangan raya it mga kaeaeakin-an nga naka-bonnet ag pilit nga ginpapanaog sa anang motor ag pagkatapos hay gin-akusahan nga imaw ro responsabli sa pagpinanakaw it andang kaeat ag iba pang mga nagakatabu nga panakawan sa andang lugar.
Ginkasahan sigon raya it baril it sambilog sa mga suspek it kapin sa limang beses ag matapos nga owa nag-eupok hay gin-eabu raya nga tumama sa anang tuo nga butkon nga anang ginpangsagang ag ginpasundan sa anang tangkugo .
Matapos ro insidente, madasig nga nagpaeagyo ro mga suspek sa indi masayuran nga direksyon samtang ro biktima hay insigidang gindaea sa ospital.
Samtang, ginpahayag ni P/Lt. Lyn Ibañes, deputy chief of police it Makato Municipal Police Station nga nagapadayun ro andang follow-up investigation sa insidente ag ro pagtumod sa pagkatawo it mga suspek.
Owa pa sigon sanda it person of interest sa krimen.
May narekober nga tatlong basiwo it pugakhang sa gin eontaran it insidente.
Apang ginatumod pa kon raya hay ginapanag iyahan it mga suspek.
Indi man makumpirma it kapulisan kon may kamatuoran ro napabalita nga may mga record sa andang barangay ro suspek .
