POLICE Report — Owa ginaeauman it sangka eaeaki nga ro anang gin-obra nga pagsura sa ‘tuba’ nga andang gina-inom ro magiging rason it anang kamatayan matapos raya nga eab-on it makapilang beses it igbata nga anang naka-inuman sa banwa it Ronda sa Cebu.
Dead-on-the-spot ro biktimang si Ryan Talatala Sardañas, 39, samtang nadakman ro suspek ag igbata kara nga si Feliciano Ortez Birondo, 56, parehong residente it Barangay Malalay, Ronda, Cebu.
Suno sa Ronda Municipal Police Station, bandang 6:45 PM kat matabu ro krimen sa nasambit nga lugar.
Nagatuhaw sa imbestigasyon, antes ro krimen hay naga-inuman ro biktima ag suspek it tuba nga mismong ro suspek ro nagpananggot sa puno it anang niyog.
Samtang sa katung-anan it inuman, gina-alegar nga ginsura it biktima ro suspek nga bukon it manami ro anang tuba bangud nga may halo nga tubi-uean.
Ginbalik-balik pa sigon it biktima nga bukon it manami ro tuba nga ginka-pikon it suspek rason nga insigida kara nga ginbo-oe ro sanduko nga may 17-pulgada ro haba ag gin-eabu it makapilang beses ro biktima sa nagkaeain-eain nga parte it anang eawas.
Nag-angkon it 22 nga tama sa eawas ro biktima nga naging rason it anang insigida nga kamatayon.
Nag-surender man ro suspek sa kapulisan nga makaron hay nagapangatubang sa kasong murder.
