KALIBO, AKLAN — Kulong ro sangka eaeaki sa isla it Boracay matapos nga mag bomb joke.
Ro supek hay gin kilaea kay Suje Negrida, 19-anyos ag residente it Agdugayan, Ibajay, Aklan.
Base sa report, personal nga nagpadueong si Mr. Jerry Partilasa sa BTAC agud mag imporma nga may sangka eaeaki nga nagsueod sa Pearl of the Pacific Resort sa Station 1 ag nagahinambae nga may bomba sa sueod nga maeupok anuman nga oras.
Bangud kara, insigidang nagresponde ro kapulisan agud beripikahon ro nasambitan nga report kun sa siin naabutan nanda ro eaeaki nga gina buytan it guard on duty nga si Arvin Tunugan ag ginturn over sa mga pulis.
Nasayuran nga hilong si Negrida kat matabo ro pagpatigayun kara it pag-bomb joke.
Temporaryo nga kulong sa makaron sa lock up cell it BTAC si Negrida para sa nagakaigo nga disposisyon.
